ИЗ «КОСТРОМСКОГО» ЖИТИЯ КНЯЗЯ
ГЕОРГИЯ ВСЕВОЛОДОВИЧА
Месяца февруария в 4 день жития и страдания святаго благоверного великого князя Георьгия Всеволодича Владимерскаго и всея Росии чюдотворца
Хотящю ми во имя Христово и пречистыя Его Богоматере поведати житие угодника их сего святаго и благочестиваго князя Георгия Всеволодовича. Прежде подобает сказание сотворити о блаженных родителех его и о достоинстве их, к тому же мало воспомянути о богоспасаемом граде Въладимире, когда и како господоначалство киевское в он прииде.
<…>
<…> Егда же блаженный сей Георгий в возраст прииде, сочетай бысть законному браку, поят убо в жену сестру великаго князя Михаила Черниговскаго. И бяше всеми обычаи благими украшен, паче же всего любяше прочитание божественных Писаний со вниманием и с великим прилежанием. И от всего зачатся в нем страх Божий и породи, по пророку, дух спасения, им же стяжа добрыя детели: умиление, смертную память, тихость, кротость, благоутробие, сострадание, смиреномудрие, милость ко всем, непомятозлобие, лубовь, милостыню, к тому же беззлобие крайнее. Не воздая бо зла за зло никому же, но всех согрешающих к нему прощаше и никого же оскорбляше, но всех умудряше духовными беседами и всех упокоеваше душевне и телесне. Вся, еже глаголаша и деяше, по божественным законом творяше. Ко святым же Божиим церквам зело бяше рачителен и велие прилежание имяше и потребами всякими удовляше. Нищия же и клосныя и разслабленныя сам своими руками омываше и странный и безпокровныя непрестанно приимая и всех доволно навещаше и напояше и милостыню всем неоскудно подаваше, поминая пророческое речение сие: «Блажен разумеваяй на нища и убога, в ден лут избавил его Господь. Господь сохранит его и живит его и ублажит его на земли и не предаст его в руце врагов его» (Пс.40: 2—3). <…> И таковым благочестием и добрыми делы цветый бяше во граде Владимире живыи, приснаго благословения отца своего благовер- наго князя Всеволода насыщался.
<…>
Приимшу же хоругви богоспасаемаго владимиръскаго самодержавия великому князю Георгию по отце своем Всеволоде. И егда нача господствовати, тогда вражда возрасте на него от брата его предреченнаго Костянтина Всеволодича. Той бо Костянтин аще и попремногу бяше благочестив и христолюбив, обаче в страсть завидения впаде, зане владимирское господоначалие не ему первому сущу в братех, но второму по нем сему Георгию от родителя их предадеся. И в первое лето по преставлении отца своего благочестиваго Всеволода, собрав воинство немалое, поиде из Ростова на брата своего Георгия Владимирскаго. Тако же и Георгий противу его с своима ратных людей полкам[и] изыде. И снидошася обоих воинства с князи своими на реце Чехде, и бысть брань между ими немала, обаче великий князь Георьгий смиренная мудростъвуя и не хотя (В изданном тексте: «неходя») видети хрестиянския крове властолюбия ради проливаемыя, пресече брань тую лубовию и кровопролития устави покорением. Видя бе брата своего Костянтина единаче брани хощет, а не мира, абие сам святый сей князь Георгий вражду разрушает и примиряется брату своему князю Костянтиню, яко менший большему, и предает державу владимирскую Костянтину со многою лубовию, яко да господствует по изволению своему обще с ростовскою. Сам же благоверный великий князь Георгий нача господствовати во иных великих градех на Городце и в Суждали, и оттоле благодатию Христа Бога и милостию пресвятыя Богородицы в велицей любви пребыша оба брата Костянтин же и Георгий.
<…>
По преставлении же великаго князя Костянтина Всеволодича паки приял владимирскую державу брат его сей святый великий князя Георгий, иже и прежде отец его вручи ему. И нача господствовати праведно и богоугодно, благочестием и верою и милосердием и милостынею попремногу сияя. Любяше же велми священнический и иноческий чин и нищих непрестанно милуя, и боляром же своим и ко всему народу аки отец чадолубивый бяше и много благодеяния повсуду в державе своей творяше.
Во граде же Суждали соборную церковь пресвятая владычицы нашея Богородицы и приснодевы Марии созда каменную изрядне и прекрасне в лето 6729. Потом обрете на реце Волге при юстии реки Оки место прекрасно и высотою гор удобренно и ту созда град и нарече его Нижний Новъград. И в нем воздвиже монастырь изрядныя во имя Успения пресвятая Богородицы и иныя божественныя храмы созда.
Некогда же посещающу ему племянники своя, князя Костянтина дети, и в Ростов Василка, в Ярославле же Всеволода, и восхоте святый во Владимир путешествовати из Ярославля водным путем. Пловущу же ему в судах великою рекою Волгою с боляры своими и с воинством, якоже обычаи великим государем. И доплывшу ему реки Унжи, яже течет в Волгу от Ярославля, вниз реки Волги разстоянием сто и осмъдесят поприщ, и ста на брезе при устии тоя реки Унжи и повеле шатры своя на брезе поставити. И в то время наиде на него сон, и абие возлеже, и бысть ему в тонце сне видение сицевое. Якобы на друзей стране Волги реки вниз на высоцей горе посреде лесу стоит икона тезоименнаго ему святаго и славнаго великомученика Георгия Победоносца, а пред нею стоит свеща неугасимая. Воспрянув же великий князь от сна и скоро поиде по брегу вниз по Волги. И прииде к заводи, яже ныне зовется его бытия ради Юрьева, и оттоле смотрити начат прилежно (В рукописи: «приложно») на другую страну Волги на горы, яко не истина ли есть, еже ему во стне видено бысть. И от многаго желания, возбуженнаго в нем от Божия благоволения, моляше Христа Бога и пречистую Богородицу и тезоименнаго своего заступника святаго страстотерпца Георьгия, прилежно и из глубины сердца своего воздыхаше, дабы приобрести ему виденное истинно. Ходящу же ему на устия тоя заводи и на он пол Волги на горы, с прилежанием смотрящу. И се внезапу узре на горах тех огненную лучю, аки звезду сияющую сквозе лесу. И абие призва от ситклита своего болярина именем Василия, по реклу Скороумнаго. И указа ему перстом на горах тех в лесе огнь светящся, аки звезду или лучу некую сияющу, и сказа ему все по ряду, како виде то во сне икону тезоименнаго своего заступника страстотерпца Христова Георгия. Болярин же той исполнен быв веселия о видении и о словесех благочестиваго князя, на лучу же зря огненную, паче радовашеся душею, благодаря Бога. И повеле великий князъ Георгий легкия суды водныя уготовити. В них же вскоре приеха с болярином своим Василием и со иными немногими на другую страну Волги. И взыдоша на брег и поидоша на гору ту лесную, не обретше ни малыя стези, пусто бо бяше место то. И не пощаде великий князь лица своего, ветими древес ударяемаго, ниже светлых и драгих ризь, своих раздираемых от сгущения леснаго, но с радостию течаше видети желаемое. И егда взыдоша на высокую ту гору, доиде князь до того места, идеже ему в явлении видеся, и ту обрете древо стоящя велие многолиственное, зовомое вяз, при корени же того древа на ветвех стоящу икону святаго и славнаго великомученика Победоносца и чудотворца Георгия, писанную же на дщее шаровными начертании, пред нею же и свещу горящу неугасимо. И падше, вси поклонишася страхом и радостию одержими, недоумеюще, како икона та обретеся, и кто принесе ю и свещу пред нею возже. Икона и свеща та не угасает, понеже самое пустое бяше мъсто и от градов и сел удалено и великия леса имуща. И дивившися зело о преславном том чудеси, прославиша Бога и угодника его и страстотерпца святаго Георгия. Святый же и благочестивый князь Георгий от великия радостии слезы от очию своею струи испущаше. И пребыстъ на том месте три дни и три нощи, моляся пред чудотворною иконою великому Христову страстотерпцу Георгию. На горе же той повеле лес посещи и место чистити. И устроиша повелением его на том месте вскоре храм древянный во имя святаго великомученика Георгия, и жителей неколико близ храма того поселишася. И повеле великий князъ на той горе создати во свое имя град на славу и память чудесем святаго страстотерпца Георгия, вкупе же и своего бытия.
И от того времене прозвася та гора именем великаго князя Юрьевъская. Такожде и новосозданный той град наречен быстъ его же именем Юрьев с приложенным названием Поволский, того ради, яко в велицей России кроме сего новаго Юрьева еще два града именем сим суть, с прозваниями же различия ради первый Юрьев прозванием Ливонской, созданный великим князем Ярославом, во святом крещении нареченным Георгием, сыном святаго и равноапостальнаго князя Владимира, хрестившаго Российскую землю, вторый же Юрьев Полской, созданный великим князем Георгием Долгоруким, сыном великаго князя Владимира Манамаха. Сей же тре[ти]й Юрьев Поволский, зане при самой велицей реце Волге. Юрьем же вси тии трие велицыи князи нарицахуся просторечием, вместо имене Георгия.
И тако благодатию Божиею и предстателством пречистыя Богородицы и призрением преславнаго мученика Георгия, повелением же великаго князя Георгия Всеволодича град той новый Юрьев Повольский не во многа лета церквами святыми и монастыри и жителми, такожде и окрестными селами и волостами доволно умножися и распространися. Церковь же по прежную на горе на чудотворном месте во имя святаго великомученика Георгия граде Юрьеву и пределом его первою нарекоша, сиречь соборную, в ней же протопресвитера и прочий причет устроиша. И сия убо о создании градов Нижнаго Нова Града и Юрьева повествовахом, по сем же паки о житии святаго и благочестиваго князя Георгия глаголати возвратимся.
Хощу же рещи и повесть плачевную о содеявших во время господствования его, яже и самех безсловесных может подвигнути на плач, о в та убо времена и лета, в ня же аки пресветлому и великому светилу сияющу благочестием и верою, на престола царском седящу на великом Российском княжении сему святому и великому князю Георгию в преславном граде Владимире, иже яко крин цветяше в добродетелех християнских день и нощь, преспевая в законах Господних и житием правым присноцветущу, ему наста время луто. За грехи наша Богу наказующу нас, таковое время прииде на ны, еже серп гнева Божия нарещи, и достоит пожинаяй и искореняяй вся нещадно, или меч, иже не точию обезчадствовати могии, но с чады и родивших посещали немилостивно, или чаша в руце Господни вина милости Божии не растворена гневом ярости, исполнь разстворения (В рукописи: «разсторения») милость свою, глаголю, со гневом наказания смеси Господь за премногия грехи наша, хотящу Богу упоити нас вином ярости и уклонити от сея, в сию сиречъ преложити от милости в наказание и от наказания в милостъ. Тако время оно именовати, понеже по премногом милостивном наказании Божии не хощем престати от скверных дел наших, тем и Бог наказует ны овогда гладом, овогда мором, овогда же иноплеменных нашествие. Сими всеми пресечение творя нам от злых наших. <…>
<…>
Вся же сия страшная знамения быша при деръжаве благочестиваго сего самодержца великаго князя Георгия Всеволодича, яже вся сия и видя и слыша, умиляшеся душею и страхом колебашеся и сего ради присно в посте и молитвах и во всяких добродетелях и в сетовании плачевном пребывайте и многи милостыни нищим и милосердие ко всем человеком наипаче творяше. <…>
И зане же бичем от первыя не наказахомся, сего ради пророческое слово на нас исполнися, яко же писано есть: «Упасеши я жезлом железным (В рукописи: «зелезным»)» (Пс. 2:9). И тако жестоким пленением Господь Бог в запустение предаде тогда многие грады и места Российскаго царствия. Наведе бо во время оно на Российскую землю мучителнейшаго варъвара, кровояднаго пса, злочестиваго ратника, безбожнаго царя Батыя, от восточный страны изшедшаго первее на Рязань, потом же на Коломну и на Москву. Та же и на преславный той самый град Владимир, в нем же благочестивы самодержец господствуя святый великий князь Георгий Всеволодич, и на иныя многия грады и на живущия в них християны, иже со многою злобою той нечестивый варьвар вся испровращая, якоже лютый и некий и злый и немилостивый зверь вся поядая, останки же ноготми разтерзая и ногами попирая. Но кто может убо исповедати то время, нашедшее за грехи наша на российский народ, и излиянную на них чашу пелыни (Так в рукописи, надо: «полыни»? (Прим. изд.) суда Божия? И кто может представити словом постигшая тогда хрестиянъский род сей? Убо нечестивый и безбожний царь Батый, яко молнии на стрела, со безчисленным множеством агарян безвестно прииде лесом, и вси сташа на окозе и взяша ю преком (Так в рукописи) и послаша ко князем рязанским, просяще у них во всем десятое и в князех и в людех и во всяком скоте. Князы же рязанские Юрии Иневгорович да брат его князъ Олег, с ними же и муромский и пронскии князы, отвещаша: «Разве аще нас не будет, тогда наше отечество ваше будет!» Послаша же рязанский князи во Владимир к великому князу Георгию Всеволодичу, да поидет с ними противу безбожных агарян. Он же сам не поиде и воинства не посла, занеже страх нападе и трепет на всех, паче же гнев Божий простреся, и сего ради поглощена быстъ премудрость могущих ратная строити дела, ни един же от князей российских поиде друг другу на помощь, ниже совокупишася вси, еже противу безбожних ополчитися. Безбожнии же они варвары видяща время себе угодное, устремишася на Российскую землю и на коегождо отечество находяще, грады взимаху, князей же и людей мечу и огну предаваху. <…>
<…>
Возвратимъся же паки о блаженном князе Георгие повествовати. Великий убо сей и приснопамятны князь Георгий Всеволодич, собрав воинство свое, стояше с полки своими близ реки Волги на реце Сите. И ту приидоша к нему вестницы, якоже древле к праведному Иову, поведающе емю, яко преимениты твои град Владимир татарове взяша, епископ же Митрофан и великая твоя княгина со дщерию и со снохами и со внучаты (В рукописи: «мнучаты») и прочия княгини и множество бояр и людей в соборней пресвятыя Богородицы церкве огнем сконъчашася. Мнози же от них в то время святый иноческий образ восприяша от епископа. Сына же твоего Владимира во граде Москве погании взяша и по многом истомлении у града Владимира показавше, его смерти предаша. Воевода же Филипп на Москве за веру Христову мучением от них же скончася. Два же старейшая сына твоя Всеволод и Мстислав в Новом граде Владимире от тех же поганых татар убиени быша. Такожде и иных людей державы твоея множество безчисленное избиено бысть, оставши же людие к тебе грядут. Блаженны же самодержец и прочия с ним, слышавше сия, воскричаша с плачем велиим, рыдающе о церковном зазорении (Так в рукописи), о епископе же и о великой княгине и о многом кровопролитии християнском. И от милостивныя и сострадателны душии своея великий князь восхлипая из глубины сердца, моляся ко Господу и, вопия сице, глаголя: «О владыко Господи Боже Вседержителу! Сице ли угодно твоему человеколюбию, яко врази наши многыя грады християнския разориша и попраша многия церковныя домы святыни твоея, и множеству людей твоих таковую злую пагубу содеяша? И аз, раб твой, лишен бых не токмо супружницы моея и чад, но и множества тобою дарованныя ми державы, и не вем, что сотворити, понеже без числа согрешихом, и ты, преблагий владыко, прогневался еси на нас и зело смирил ны еси! Яко праведен еси Господи и праведным судом твоим многопролитием неповинныя крове рабов твоих многия ныне новыя мученики к себе привел еси, и почто аз един остах смирен и посрамлен? Но, о премилостивыя Господи, Господи, милости твоя не отстави от нас, и мене грешнаго и недостойнаго раба твоего сподоби пострадати со христоименитыми сими людми твоими истинныя ради и непорочныя веры християнския и имени ради твоего святаго Отца и Сына и Святаго Духа, и за дом пречистыя владычицы нашея Богородицы и приснодевы Марии, и причти мя наследию вечных твоих благ с новыми сими твоими мученики, и о всех сих да будет воля твоя святая, яко благословен еси во веки! Аминь».
И тако святому и блаженному самодержцу великому князю Георгию в велице печали молящуся со многими слезами, и помалу нача укреплятися и всу печаль свою вотверже на Бога и на пречистую Богородицу и одним гласом утешаяся. «Якоже годе Господиви бысть, тако и бысть буди имя Господне благословенно во веки». И абие со всеми полки своими уготовися к супостатом на брань, еже за православную веру и за християн крепко стояти. Поганый же царь Баты и все его нечестивое воинъство скоро приближашися. И егда сступишася русстии вои с безбожными срацыны, и бысть брань велика зело и сеча зла и кровь многа, яко вода пролияся. Богу же попустившу, побежденыи быша российстии князи и боляре и все воинство от поганых татар, идвже святый и благочестивый российский самодержец великий князъ Георгий пострада за Христа и за православную христианскую непорочную веру, убиен бысть от нечестиваго Батыя и венчася кровию, ею же взыде ко Христу Богу нашему, от него же и мученический венец прият, его же желаше, в лето от бытия мира 6746 месяца февруария в 4 день. И повержено бысть святое тело его ту на поли не брегомо.
Егда же погании татарове инамо уклонишася, тогда блаженный Кирилл епископ Ростовский, идый з Бела езера, и прииде на место, идеже доброповедный Христов мученик великий князь Георгий Всеволодич святую свою кровь пролия от безбожных татар, подвизаяся по отеческом достоянии. И ту обрете блаженный Кирилл честное тело его, еже со многими слезами благоговенно и взем, принесе во град Ростов и пев над ним надгробныя пения со всем освященным собором и с протчим причтом. Плачю же и воплю велику бывшу от всего христоименитаго народа. И положиша и честно в церкви пречистыя Богородицы в Ростове. Главы же его тогда не обрете епископ во множестве трупия мертвых. Последи же нецыи от благочестивых обретоша и святую главу его, и принесоша в Ростов и положиша ю в гробе к честному телеси его, яже Божиим благоволением абие прилпе к телеси его, яко всем удивитися и Бога прославити, прославляющаго угодника своего.
По сем же времени убо малу мимошедшу по убиении святаго и благочестиваго князя Георгия и по взятии великаго и столнаго града Владимира со всеми его благими узорочии и по отшествии во своя богомерскаго и злочестиваго царя Батыя, прииде из Новаграда великий князь Ярослав Всеволодич, брат сего святаго Георгия, и прият престол великаго княжения в преименитом граде Владимире, его же от трупия мертвых очисти и церкви святыя очистив обнови, оставшиеся же люди собрав, любезне утеши. Егда же ему из Новаграда пришедшу, виде столъния и славный свой град Владимир погаными весь разорен и огнем попалон, и хитрая его здания и церквии святыя разрушены, и вся красота его погублена, брата же своего, великаго князя Георгия Всеволодича, убиена, и архиереа и весь освященный собор и множество князей и боляр и прочих благородных людей российских горцей смерти преданных. И восплакася великий князъ Ярослав в горести сердца своего и воздев руце свои на небо и рече: «Господи Вседержителю и Творче всея твари видимыя же и невидимыя! Сице ли угодно Твоему человеколюбию, да сие стадо Твое, Христе, еже искупил еси ценою крове Своея божественныя, предал еси кровопияцем и сыроядцем поганым человеком, звериный нрав имущим, паче же рещи врагом Твоим, не знаущим Тебе, истиннаго Бога нашего Иисуса Христа, и страха Твоего никогда не имущим? И ныне поработихомъся раби Твои богомерскому цару, неправедну и лукавнейшу, паче всей земли и град сей предан бысть, якоже древе и Иерусалим Навуходоносору царю Вавилонскому, и есмы смирени ныне паче всех языков грех ради наших. Увы мне, Господи! Священники Твоя заклаша, имъ же не бе достоин весь мир, и олтари Твоя раскопаша и святыя Твоя вся в попрание бысть скверным ногам их, и вси люди Твоя острием меча поразиша, и раба Твоего благочестиваго князя Георгия за имя Твое святое убиша, и остах аз един. И ищут и мене поглотити. Но избави мя, Господи, от рук их ради пречистыя Твоея Матере и непостыдныя к тебе ходатаицы о нас грешних! И упокой души рабов Твоих, избиенных от безбожних агарян имене Твое ради святаго, со всеми святыми в Царствии Твоем и спаси мя, раба твоего, ими же веси и судбами, яко благии и человеколюбец! Аминь».
По молитве же благоверный и великий князь Ярослав повеле избиенных телеса предати всех земному погребению честне. Потом же посла из Владимира в Ростов благоговеинныя мужы от духовнаго и от ситклитскаго чина и повеле принести с великою честию во град Владимир честное и святое и страстотерпческое тело брата своего, святаго и великаго князя Георгия. Пришедшу же послании в Ростов и вземше святое тело его, со многою честию понесоша е. И егда быша близ преименитаго града Владимира, срете его сам великий князь Ярослав и боголюбивый епископ Кирилл со всем освященным собором и с боляры и со всенародным множеством граждан и окрестных со юмилением и слезами. И бысть тогда по блаженном сем самодержце и страстотерпце от всего народа плач велик зело, рыдание же и стенание. И положиша святое его тело во граде Владимире в соборне церкви Успения пресвятая владычицы нашея Богородицы и приснодевы Марии верху помоста со псалмы и пе[c]нъми надгробными. Всем же зрящим видети есть чудо преславно и удивлению достойно. Яко святая глава его тамо совокупно прилпе ко честному телеси его, яко ни следа видети отсечение на шии его, но и вся составы целы и неразрушены, иже и доныне тако во граде пребывающе, храними верху земли от всех людей видими и удивляеми и достойно почитаеми, подают благодатию Божию различная исцеления всем притекющим с верою. Еще же и рука его десная выспрь бяше воздеяна, и видета ею же, яко живу показует подвиг своего совершения, яко восприят от Бога вместо земнаго царствия Небесное Царство и вечъных благ наслаждение вкупе с царственъною си супружницею и с треми благороднейшими сыны и с их княгинями и с единою си благородною дщерию. Самодержавствова же в преименитом граде Владимире по смерти брата своего Констянтина двадесят и пять лет. Празднует же церковъ Божия память его месяца февруараия в 4 день, в онже и пострада за Христа и за християнъскую православную и непорочную веру и за християнския Российския земли народ.
<…>
<…> Мы же сия писанию предахом в память последующим родом, да не забвены будут добродеяния и за Христову веру страдания святаго благовернаго великаго князя Георгия Всеволодича, такожде и сродников его благочестие ведомо будет, имиже Бог в Троице славимыи прославляшеся и ныне славится, дивен сыи во святых своих, емуже слава подобает, честь и поклонение (В рукописи: «поклонение»), великолепие ныне и присно и во веки веков. Аминь.
(По изданию: Сиренов А. В. Путь к граду Китежу: Князь Георгий Владимирский в истории, житиях, легендах. СПб., 2003. С. 120-155.)
ИЗ «КИТЕЖСКОГО ЛЕТОПИСЦА»
Книга глаголемая Летописец, писана в лето 6646 (1237) сентября в 5 день.
Бе сей святый благоверный и великий князь Георгий Всеволодович сын святому благоверному и великому князю Всеволоду, а во святом крещении наречен бысть Гавриил, псковский чудотворец. Сей святый благоверный и великий князь Всеволод сын бе великому князю Мстиславу, внук же святому и равно апостолом великому князю Владимиру Киевскому, самодержьцу Российския земли. Святый же благоверный и великий князь Георгий Всеволодович — правнук же святому благоверному и великому князю Владимиру.
Святый же благоверный княз Всеволод первие княжи в Великом Нове-граде. Егда же бысть время, возропташа новгородцы на нь и реша сами собою промежь себе, яко князь наш, не крещен сый, владеет нами крещеными. Совет же сотвориша, и приидоша к нему, и изгнаша вон. Он же прииде в Киев к дяде своему Ярополку и сказа ему все, за что изгнан бысть новогородцы. Он же, слышав от него, и въда ему Вышград. И ту молим бысть от псковичь княжити у них, и прииде к ним во град Псков. И по времени восприя благодать святаго крещения, и наречен бысть во святом крещении Гавриил. И пребысть в велком пощении и воздержании, и пребысть лето едино в вечный покой отиде, в лета 6671-го (1163-го), месяца февраля в 11 день. И погребен бысть сыном его благоверным и великим князем Георгием. И быша чудеса многа от святых мощей его в славу и хвалу Христу Богу нашему и всем святым. Аминь.
Сей святый благоверный князь Георгий Всеволодович по преставлении отца своего благоверного князя Всеволода, нареченного во святом крещении Гавриила, пребысть на месте его по умолении псковичь. Бысть же сие в лета 6671 (1163). Изволи святый благоверный и великий князь Георгий Всеволодовичь ехать к благоверному князю Михаилу Черниговскому. Егда же прииде к благоверному князю Михаилу и благоверный и великий князь Георгий, и поклонися благоверному князю Михаилу, и рече ему: «Здрав буди, благоверный и великий княже Михаиле, на многая лета, сияя благочестием и верою Христовою, во всем уподобися прадедом нашим и прабабе нашей, благоверной великой княгине, христолюбивой Олге, иже обрете себе избранного и честного: бисера Христа, и веру его святых пророк же и апостол, и святых отец, и благоверному христолюбивому царю и равноапостольному прадеду нашему, царю Константину». И рече ему благоверный князь Михаил: «Здрав же буди и ты, благоверный и великий княже Георгий Всеволодовичь, прииде ко мне з благим советом и независтным оком. Что бо приобрете от зависти дед наших Святополк, иже восхоте владети и уби братей своих благоверных и великих князей. Бориса повеле копием пробости, Глеба же ножем заклати в лета княжения их. Обольсти бо их лестию и советом сатаниным, яко мати при смерти есть наша. Они же, яко незлобивые агньцы, уподобишася благому пастырю своему Христу, не сопротив сташа врагу своему брату. Господь же прослави святыя угодники своя, благоверных князей и великих чудотворец Бориса и Глеба».
И даша целование промеж себе сами, и праздноваша духовно и веселивъшеся, и рече благоверный и великий князь Георгий благоверному князю Михаилу: «Даждь ми грамоту в Русии нашей по градом церкви Божия строити и грады». И рече ему благоверный и великий князь Михаил: «Якоже хощеши, тако и сотвори церкви Божия в славу и хвалу пресвятому имени Божию. За сие доброе твое изволение мзду приимеши в день пришествия Христова».
И пироваше много дний. И егда изволи благоверный князь Георгий ехати во свое место, тогда благоверный князь Михаил повеле грамоту написати и свою руку приложи к грамоте. И егда благоверный князь Георгий поеха во свое отечество и град, тода благоверный князь Михаил с великою честию отпущяше его и провожаше. И егда бысть оба князи на пути, и поклонистася друг другу на пути, и вда ему благоверный князь Михаил грамоту. Благоверный же князь Георгий взя грамоту у благовернаго князя Михаила, и поклонися ему, тогда и той противу ему.
И поеха по градом, и егда приеха в Нов-град, повеле строити церьковь во имя Успения пресвятыя владычицы нашей Богородицы и приснодевы Марии в лето 6672 (1164). Из Нова-града поехав во Псков, град свой, идеже преставися отец его, благоверный князь Всеволод, а во святом крещении Гавриил, новогородский и псковский чудотворец. И поеха изо Пскова града к Москве, и повеле строити церковь во имя Успения пресвятыя владычицы нашея Богородицы и приснодевы Марии в лето 6672 (1164). И поеха с Москвы в Переславль Залеской, а с Переславля града в Ростов град. В то же время бысть в Ростове граде великий князь Андрей Боголюбский. И повеле благоверный князь Георгий во граде том Ростове церковь строити во имя Успения пресвятыя владычицы нашея Богородицы и присно девы Марии в лето 6672 (1164), месяца маия, в 23 день. Во дни великого князя Георгия начаша рвы копати на основание церкви, обретоша же мощи лежаще святителя Христова Леонтия епископа ростовского, чюдотворца, иже обрати в Ростове граде люди в веру христову и крести их от мала и до велика. И возрадовашеся радостию великою благоверный князь Георгий и прослави Бога, давшаго ему таковое многоценное сокровище, и отпе молебен. И повеле ехати Андрею, князю Боголюбскому, во град Муром и строити во граде Муроме церковь во имя Успения пресвятыя владычицы нашея Богородицы и присно девы Марии.
Сам же благоверный и великий князь поеха из града Ростова, и приеха во град Ярославль, что на брегу Волги реки стоит. И седе в струг, и поеха на низ по Волге, и приста к брегу в Малый Китежь, что на брегу Волги стоит, и построи его. И начаша его молити вси людие града того благовернаго князя Георгия, чтобы образ чудотворный иконы пресвятыя Богородицы Феодоровския внес во град к ним. Он же по прошению исполни. Начат пети молебен пресвятей Богородице. Егда сконча, восхоте образ той нести во град, образ же не пойде с места того, нимало не поступи. Видев же благоверный князь Георгий изволение пресвятыя Богородицы, где сама изволила место себе, повеле построити на том месте монастырь во имя пресвятыя Богородицы Феодоровския.
Сам же благоверный князь Георгий поеха с места того сухим путем, а не по воде. И перееха реку Узолу, и вторую реку перееха именем Санду, и третию реку перееха именем Саногту, и четвертую перееха именем Керженец, и приеха к езеру именем Светлояру. И виде место то велми прекрасно и многолюдно. И по умолению их повеле благоверный князь Георгий Всеволодович строити на брегу езера того Светлояра град именем Болший Китеж, бе бо место то велми прекрасно, и на другом же брезе езера того роща дубовая.
Советом же и велением благоверного и великаго князя Георгия Всеволодовича начаша рвы копати на утверждение места. И начаша класти церковь во имя Воздвижения честнаго креста Господня, вторую же церковь — во имя Успения пресвятыя владычицы нашея Богородицы и присно девы Марии и третию церковь — во имя Благовещения пресвятыя владычицы нашея Богородицы и присно девы Марии. В тех же церквах повеле пределы делати иных праздником Господьскым и Богородичным. Тако же и образы всем святым написати повеле.
И град той Больший Китежь на сто сажен в длину и в ширину, и бысть первая мера мало место. Повеле же благоверный князь Георгий еще на другое сто сажен прибавити в длину, и бысть мера граду тому в длину — два ста сажен, а в ширину — на сто сажен. И начаша же град той каменный строити в лето 6673 (1165), месяца маия в 1 день, на память святаго пророка Иеремия и иже с ним. И строитца град той три лета, и построиша его в лето 6676 (1168), месяца сентября в 30 день, на память святаго священномученика Григория Великия Армении.
И иже поехаша в Малый Китежь, что на брегу Волги стоит, благоверный князь Георгий Всеволодович. И по строении градов тех, Малаго и Большаго, повеле перемеряти поприща, коль много межь собою расстояния имеют. И повелением благовернаго князя Георгия намеряша сто поприщь. Благоверный же князь Георгий Всеволодовичь, слышав сия, воздаде славу Богу и пресвятей Богородице, повеле же и летописец книгу написати. Сам же благоверный и великий князь Георгий Всеволодовичь повеле всю службу отслужити. И молебен пропев пресвятей Богородице Феодоровской, и по совершении службы тоя поеха, всед в струг свой, и отплы в путь свой в прежде реченный свой Псков град. Людие проводиша его с великою честию, и целоваша его, отпустиша.
Благоверный же князь Георгий Всеволодовичь егда приеха во град свой, прежереченный Псков, и многи дни пребысть в молитве, в посте же и бо бдении, и много милостыни раздая нищим, и вдовицам, и сиротам. По построении же градов тех поживе лет 75.
Быст в лето 6747 (1239). Попущением Божиим грех ради наших прииде на Русь воевати нечестивый и безбожный царь Батый. И разоряше грады и огнем пожигаше, церкви Божия такоже разоряше и огнем пожигаше же. Людей же мечю предаваше, а младых детей ножем закалаше, младых дев блудом оскверняше. И бысть плач велий.
Благоверный же князь Георгий Всеволодовичь, сия слышав, плакаше горко. И помолився ко Господу и пресвятей Божией Матери, собра вои своя, поиде противу нечестиваго царя Батыя с вои своими. И егда сразишася вои обои вкупе, бысть сеча велия и кровопролитие.
Тогда у благовернаго князя Георгия и бысть мало вой, побеже благоверный князь Георгий от нечестиваго царя Батыя вниз по Волге в Малый Китеж. И много брася благоверный князь Георгий с нечестивым царем Батыем, не пущая его во град свой.
Егда же бысть нощь, тогда благоверный князь Георгий изыде тайно из града того въ Больший град Китеж. На утрие же воста той нечестивый царь на град той с вои своими, приступом приступи и взя его. И всех поби и прируби людей во граде том. И не обрете благовернаго князя во граде том, нача мучити человека, и немогий мук терпети поведа ему путь. Той же нечестивый гнаше вслед его. И егда прииде ко граду тому, нападе на град той со множеством своих, и взя той град Больший Китеж, что на брегу езера Светлояра, и уби благовернаго князя Герогия месяца февраля в 4 день. И поеха из града того нечестивый той царь Батый. И после его взяша мощи благовернаго князя Георгия Всеволодовича.
И после разорения того запустеша грады те, Малый Китежь, что на брегу Волги стоит, Больший же, что на брегу езера Светлояра.
И не видим будет Болший Китежь даже и до пришествия Христова, яко же и в прежняя времена бысть сия, яко же свидетельствуют жития святых отец, патерик Монасийский, и патерик Скитский, и патерик Азбучный, и патерик Иеросалимский, и патерик Святыя Горы, яко сия святые книги согласны, в них писаны жития святых отец, и сокровенныя обители не едина, но много монастырей, и въ тех монастырех много множество бысть святых отец, яко звезд небесных просияв житием своим. Яко песка морскаго невозможно исчести, тако и сих невозможно писанию предати и вся списати. О них же, провидя Духом Святым, блаженный и пророк Давыд царь, удивляясь, вопиет Духом Святым, в богодухновенной книге своей Псалтыри глаголет: «Праведник яко финик процветет и яко кедр иже в Ливане умножится, насаждени в дому Господни во дворех Бога нашего процветут» (Пс. 91:13-14). И еще той же пророк царь Давыд: «Мне же зело честнии быша друзи твои, Боже, зело утвердишася владычествия их, изочту их, и паче песка умножатся» (Пс. 138:17-18). О сих, провидя Духом Святым, блаженный апостол Павел в послании книги своея глаголет, провидя, сие слово к нам глаголет: «Проидохом во овчинах и козиях кожах, лишени, скорбящеи, озлоблени, имже не бе достоин мир» (Евр. 11:37-38). То же слово и святый Иоанн Златоуст рече, в поучении своем глаголет в неделю 3-ю поста. То же слово, провидя, к нам святый Анастасий горы Синайския глаголет. Сие же слово апостольское, провидя, нам глаголет и преподобный отец наш Иларион Великий, о святых пишет: «И такоже убо в последнее время будет сие: грады и монастыри сокровеныя будут, якоже антихрист царствовати начнет в мире. Тогда побегут в горы и в вертепы, и в пропасти земныя». Человеколюбивый же Бог не оставит тогда хотящаго спастися. От усердия, и умиления, и слез все человеку Бог строит. Самого Спасителя Божественная уста глаголаше в пресвятом Евангелии, рече, яко вся ищущему и хотящему спастися дастъся (ср. Мф. 7: 7—8; Лк. 11:9-10).
И по убиению святаго и благовернаго и великаго князя Георгия Всеволодовича и по погребению честных мощей его, в лето 6-е прииде той царь Батый воевати в русское царство. Пойде же противу Батыя царя благоверный князь Михаил Черниговский з боярином своим Феодором. И егда сразишася вои обои вкупе, и бысть кровопролитие велие. И уби той нечестивый царь Батый благовернаго и великаго князя Михаила Черниговскаго з болярином Феодором в лето 6750 (1242), месяца сентября в 20 день. И после убиения благовернаго князя Михаила Черниговскаго во 2-е лето уби благовернаго князя Меркурия Смоленскаго той нечестивый царь Батый в лета 6755 (1247), месяца ноября в 24 день. И бысть запустение московскаго царства и прочих монастырей и того града Большаго Китежа в лето 6756 (1248).
(По изданию: Библиотека литературы Древней Руси. Т. 5: XIII век. С. 168—177. Подг. текста, пер., коммент. Н. В. Понырко. Электронный ресурс: http://lib. pushkinskijdom.ru/Default.aspx?tabid=4960.)
КАРТА МОНГОЛЬСКОЕ НАШЕСТВИЕ НА РУСЬ
ОСНОВНЫЕ ВЕХИ БИОГРАФИИ ВЕЛИКОГО КНЯЗЯ ЮРИЯ ВСЕВОЛОДОВИЧА
1188, 26 ноября — рождение.
1191, 28 июля — постриги.
1205, 19 марта — смерть матери.
1209, 26 марта — победа над рязанскими полками на реке Дрезне.
1211, 10 апреля — женитьба на Агафье Всеволодовне.
1212, 15 апреля — смерть отца. Юрий во исполнение предсмертной воли отца
становится владимирским князем. Начало войны с братом Константином.
1213, 23 октября — рождение старшего сына Всеволода.
1216, 21 апреля — поражение на Липице.
Юрий лишается Владимира и получает от брата Константина Городец Радилов.
1217 — примирение с Константином.
11 сентября — Юрий занимает Суздаль.
Рождение сына (либо второго, Мстислава, либо третьего, Владимира).
1218, 2 февраля — смерть брата Константина. Юрий вновь великий князь Владимирский.
1220, лето — поход на Волжскую Болгарию.
Зима — мирный договор с Волжской Болгарией.
1221 — основание Нижнего Новгорода.
1223, 31 мая — поражение русских князей на реке Калке.
1224 — поход Юрия в Торжок.
1226 — поход в Черниговскую землю для заключения мира между Михаилом
Черниговским и Олегом Курским.
1228, 21 сентября — рождение дочери Феодоры.
1229, январь — поход на мордву.
Ссора с братом Ярославом и племянниками Константиновичами.
7 сентября — примирение в Суздале при посредничестве епископа Митрофана.
Мир с Волжской Болгарией.
1230, 9 марта — перенесение во Владимир останков Авраамия, мученика
Болгарского.
14 апреля — женитьба старшего сына Всеволода.
Голод и мор в Новгороде.
1236/37, зима — женитьба сыновей Мстислава и Владимира.
1237, декабрь — вторжение орд Батыя в пределы Рязанского княжества.
1238, 7 февраля — взятие Владимира. Гибель всей семьи великого князя: жены, трёх
сыновей, дочери, невесток и внучат.
4 марта — гибель Юрия на реке Сити.
1239 — перенесение тела Юрия Всеволодовича из Ростова во Владимир.
РОСПИСЬ РОДОСЛОВИЮ ВЕЛИКИМ КНЯЗЕМ
Первый великий князь Рюрик; от Рюрика Игорь; от Игоря Святославль; от Святославля Владимир Киевский; от Владимира Ярослав; от Ярослава Всеволод; от Всеволода Владимир Манамах; а от Владимира Манамаха князь Юрьи Долгорукий; а от Юрья Долгоруково благоверный князь Андрей Боголюбский да Димитрий Всеволод; а от Димитрия Всеволода благоверный великий князь Георгий, что лежит во плоти, да брат ево великий князь Феодор Ярослав, великого князя Александра Невскаго отец…
НАДПИСИ НА ГРОБНИЦЕ СВЯТОГО БЛАГОВЕРНОГО ВЕЛИКОГО КНЯЗЯ ГЕОРГИЯ ВСЕВОЛОДОВИЧА
Божиею милостию и повелением Благочестиваго и Христолюбиваго Государя нашего Царя Великаго Князя Михаила Феодоровича всея России, по благословению и обещанию отца его и богомольца Великаго Господина, святейшаго Кир Иосифа, патриарха Московскаго и всея России, лета 7153/1645 сделана сия рака серебряная и позлащенная его святительскою казною в великий град Владимир, в соборную Апостольскую церковь Пресвятыя Богородицы честнаго и славнаго ея Успения, Благоверному Великому Князю Георгию Всеволодовичу, мученически венчавшемуся кровию за веру христианскую, Владимирскому чудотворцу, убиенному от злочестиваго и безбожнаго царя Батыя в лето 1237 Февраля в 4 день за Волгою рекою, на реке Сите. По убиении ж его блаженный Кирилл, епископ Ростовский, прииде с Бела озера на место, идеже добропобедный Христов мученик великий князь Георгий святую кровь свою пролия, ту обрете честное тело его и принесе в Ростов и положи в церкви Пресвятыя Богородицы, главы же его не обрете тогда во множестве трупия мертвых, последи же обретоша и святую его главу и принесоша в Ростов и положиша ю во гробе к честному телеси его, и в лето 6743/1239 прииде из Новаграда во град Владимир брат великий князь Ярослав Всеволодович и посла в Ростов, повеле принести во Владимир честное и святое тело брата своего великаго князя Георгия, егоже вземши со многою честию понесоша. Егда же бысть близь города Владимира, срете его сам великий князь Ярослав с епископом Кириллом и со священным собором и с детьми своими и с боляры и положиша его в соборной церкви Пресвятыя Богородицы в приделе южном, с песньми надгробными, всем же зряшим чудо преславно и удивления достойно, яко глава его совокупно прильпе к честному телеси его, яко ни следа видети отсечения на выи его, но все составы целы и неразлучны и доныне так в гробе почивают, от всех людей видимы и удивляемы. В то же лето 153 в 5 число Января по обещанию Великаго Господина, святейшаго Кир Иосифа, патриарха Московскаго и всея России, в третие лето патриаршества его, принесены быша могли благовернаго великаго князя Георгия из придела в соборную церковь Пресвятыя Богородицы и переложены в серебряную раку позлащенну и поставлены быша на десной стране близь святительскаго места
во славу и честь Благоверному Великому Князю Георгию мученику Владимирскому чудотворцу во веки. Аминь.
